القدس مليان بالجراح

القدس مليان بالجراح

أهل الكتاب يامسلمين
يا مؤمنين
يا موَّحدين
القدس مليان بالجراح
إصحوا يا ناس يا ميِّتين
يا خلق حي على الكفاح
فين السيوف
فين الرماح
ودِّيتوا فين كل الدروع ؟
خبيتوا فين كل السلاح ؟
دا القدس جاهِربالأنين
سايبينوا يستنجد بمين !
مرِّت سنين
وانتوا هِنا
حطـِّيتوا راسكم جوّه طين
وبقيتوا فيه متحنطين
لا الفجر بان
أو حتى لاح
في ليل طويل ملهوش صباح
وانتو هنا مستموِّتين
تماثيل وأصنام من حجر
متلـَّصَّمه طول السنين
مش عاوزه تتحوِّل بشر
والقدس صابر مستكين
لاكن دموعه بتنهـَمَر
والحسره ساكنه في العينين
والأرض تحته بتنحَفـَر
مش لاقي غير شعبه الحزين
وحده بيتحدى الخطر
ومفيش ف إيده غير حجر
وف قلبه ذكرى دير ياسين
يوم ما الضمير مات وانتحر
لما الوليد يومها اتنحر
والناس بقـُم متشرَّدين
ويوميها كان برضو العرب
عود من حطب
حاول تكون ليه كلمِتـُه
لاكنه أخفق وانكسر
والغدر هوَّ اللي بقي
والظلم هوَّ اللي انتصر
أهل الكتاب يا مسلمين
فين مصحف الدين الشريف
ليه سيبتوا حبل الله المتين
ليه قلبكوا مليان بخوف
ووصية الهادي الأمين
مركونه فوق كل الرفوف
تالت بيوت الله يا ناس
حافظوا عليه يا مؤمنين
موش بس قطعه من التراث
لاكنه أولى القبلتين
صلـَّى ف ساحته المصطفى
ووراه جموع المرسلين
من يومها نورُه ماانطفىَ
لاكن بهـَت م المعتدين
يا رب عجِّل بالشِفا
واشرح صدور المسلمين
زيل التجاهل والجفا
واكتب لنا النصر المُبين
رجع لنا المجد اللي راح
والقدس من غير الجراح
من غير ألم
من غير أنين

*************